As actividades culturais no parque continuarán este domingo ao mediodía coa Romaría do Lecer, un festexo organizado pola Asociación Cultural Xacarandaina en colaboración co Concello
Multitude de persoas asistiron este sábado á celebración da sardiñada popular do parque de Santa Margarida, unha actividade aberta á cidadanía coa que o Goberno de Inés Rey reforzou a programación festiva previa á edición do San Xoán deste ano.
Na sardiñada popular, que comezou ás 19.00 horas de hoxe, repartíronse 500 quilos de sardiña fresca, o equivalente a unhas 3.500 racións, que incluíron sardiñas, pan e bebida.
Ademais, e xa desde primeira hora, gaiteiros pertencentes á Asociación Cultural Xacarandaina amenizaron o evento, que se prolongará ata case a medianoite de hoxe, coa actuación final dun DJ.
Os festexos desta xornada estendéronse tamén ao anfiteatro do parque, onde ás 18.00 horas comezou unha foliada infantil con Xacarandaina, Son D’Aquí e San Pedro de Nós.
Neste sentido, está previsto que a programación cultural deste sábado continúe ás 21.30 horas, co concerto do grupo Lagharteiras. A foliada continuará a partir das 22.30 horas con diversos grupos das asociacións Xacarandaina, Donaire, Santaia de Santa Cruz,
Abaladeiras de Muxía, Santiaguiños de Boimorto, Cantigas e Agarimos de Santiago, Arume de Caión, Alxibeira de Narón e Carcaxía de Malpica.
A Romaría do Lecer pon o peche ás actividades festivas este domingo 18
Este domingo, e a modo de clausura, terá lugar a Romaría do Lecer, un festexo organizado pola Asociación Cultural Xacarandaina en colaboración co Concello. Comezará no parque ás 12.00 horas e haberá diversas actividades de baile e música, ideadas para todos os públicos, con asistencia de balde.
